Orain Amurrio udal-taldeak prentsa-oharra zabaldu du salatzeko abenduan ez dela udalbatzarik egingo. Azaroan horrela erabaki zuten udal osoko bilkuran EAJ, PSE-EE eta PP taldeen aldeko bozekin. Orain Amurriok, Amurrio Guk Baik eta EH Bilduk, ordea, kontrako botoa eman zuten. Abenduko udal osoko bilkura ez ezik abuztukoa ere ez da egingo.
Orain Amurrioren ustez erabaki horrek udalaren kudeaketa motelduko du eta taldeen adierazpen gaitasuna murriztu.
Horri aurre egiteko, Orain Amurriok eskaini zien EH Bilduri eta Amurrio Guk Bairi premiazko udalbatza deitzea abenduan. Baina proposamenak ez du babes nahikorik jaso.
Orain Amurriok bi mozio aurkeztu nahi ditu; bata finantza-maileguak atzeratzeko, dirua auzoetan inbertitzeko, eta ibaiaren eta araztegiaren inguruan bestea.
Dietei uko egiteko prest
Azaroko udal osoko bilkuran erabaki zuten abenduko eta abuztuko udalbatzak bertan behera uztea. Arrazoi ekonomikoak argudiatu zituzten horretarako, besteak beste. Hori dela eta, Orain Amurriok azaldu du prest dagoela uko egiteko udal osoko bilkura horietan parte hartzeagatik dietetan jasoko lukeen diru kopuruari.