Amurrioko San Anton Armurun zaharren egoitzan 8 langile kaleratuko dituztela salatu dute hainbat sindikatuk; CCOO, ELA, LAB, SATSE, ESK eta SAE erakundeek alegia.
Erabakia eraikinean egingo diren lanen ondorioa da, ELAk azaldu duenez. Arabako Foru Aldundiak obra horiek direla eta erabiltzaileak 4 erakunde pribaturen esku utziko dituela ere salatu du ELA sindikatuak.
“Ongizate Sailak ordainduko du hori. Eta gogoratu behar dugu zerbitzu pribatuak publikoak baino askoz garestiagoak direla” adierazi du Begoña Gonzalez ELAko kideak.
8 kaleratze
Sindikatuek jakinarazi dute 8 langile botako dituztela lanak egiten dituzten bitartean. Eta martxoan, obrak bukatzen direnean, ez dakite beharginak berriro lanera itzuliko diren.
“Gerentziak informazioa helaraziko zigula esan zuen baina ez du egin” salatu du Begoña Gonzalezek.
Lanaldi murrizketak
Kaleratzeak ekiditeko langileek proposatu zioten gerentziari lanaldia murriztea, baina horrek ez zuen onartu. Gainera, ELAk aipatu du geldituko diren langileek ez dutela lanaldi osoa betetzeko aukera izango, obren eraginez.
Hori dela eta, beharginek askoz gutxiago kobratuko dutela azaldu du ELAk. Gatazkak epaitegian bukatzeko aukerak ditu, Begoña Gonzalezen iritziz.
Kartelak eta bilerak alderdiekin
Bere aldarrikapenak zabaltzeko kartelak jarri dituzte zaharren egoitzako langileek. Horrez gain, beharginen ordezkariek EH Bildu eta Ahal Dugu/Podemos alderdiko kideekin elkartuko dira astelehenean Gasteizen.