Orain Amurriok eta Podemos Ahal Dugu Amurriok hitzaldia antolatu dute, gaur, ostirala, Amurrioko kultur etxean 19:00etan errefuxiatuen exodoa eta gerrateak Sirian eta mendebalde hurbileko lurraldeetan utzitako ondorioen inguruan.
Antolatzaileek adierazi dute hitzaldiaren helburua dela errefuxiatuek bizi duten emergentzia egoera gizarteratzea; bai eta gerrak eragindako kalteak eta nazioarteko indarren interes geo-estrategikoak azaleratzea.
Suniva Martínez, CEAR-Euskadiko abokatua, eta Juan Sorin, Neword erakundeko kidea, izango dira hizlari. Suniva Martínez errefuxiatuen egoeraz eta Europar Batasunaren paperaz mintzatuko da, Juan Sorin, ordea, herri kurduaren egoera izango du aipagai.
Orain Amurrio, gainontzeko alderdi politikoekin batera, Amurrioko udalean, Siriako errefuxiatuen alde onartutako adierazpen instituzionaleko sinatzailea da. Haien hitzetan, adierazpen horretan jasotakoa bete dadin egingo dute lan. Laudioko eta Urduñako udalek ere antzeko adierazpenak onartu zituzten udal talde guztien onespenarekin.