Arabako EH Bilduk Saratxoko saihesbidearen proiektuaren inguruko prentsa oharra bidali du, herrian egon ostean. Proiektua moldatu behar dela azpimarratu du koalizioak prentsa oharrean.
EH Bilduren ustez, Amurriotik Urduñara doan errepidea moldatzeko mahai gainean dagoen proiektua “neurriz kanpokoa” da. EH Bilduko bozeramailea den Kike Fdez. de Pinedok, Nerea Martínez eta Ieltxu Orueta biltzarkideekin batera, EH Bilduko ordezkariekin, Urduñako Alkatea den Idoia Aginakorekin eta Saratxo 2.0 plataformako kideekin bildu zen, proiektuak "premiazko soluzioa" behar duela ondorioztatuaz, errepide horretatik milaka auto pasatzen baitira egunero. Gainera, azken urteotan istripu ugari izan dira Saratxoko errepidean.
Errepidea zabaltzeko Arabako Foru Aldundiak duen proiektua, baina, "gehiegikeria" da, Arabako EH Bilduren ustetan. Horregatik, proiektua bera moldatzeko konpromisoa hartuko dutela azpimarratu zuen Fdez. de Pinedok.
Zentzu horretan, gaur egungo proiektua bertan behera uztea eskatuko dio koalizioaren bozeramaileak Bide Azpiegituren Foru Sailari eta prozesu partehartzaile bat zabaltzea exijituko dio, Saratxoko biztanleekin talka berriro gertatu ez dadin.
Amaitzeko, hori guzti hori lege-agintaldi honetan egitea beharrezkoa dela azpimarratu du EH Bilduk. Alde batetik, segurtasuna bermatzeko eta, bestetik, "Arrastaria eta Urduñako garapen sozioekonomikorako funtsezkoa" delako.