Bi leku nagusitan ospatzen dira Baranbioko Andra Mari Txiki Jaietako ekintzak. Asko herrian bertan egiten dira, baina badaude baita Garrastatxuko baselizan egiten direnak ere, jaien azken egunean egingo de Paella lehiaketa edota Aiara Dantza Taldearen erakustaldia, adibidez.
Lehiarik ez aurten
Baina Baranbioko Andra Mari Txiki jaiak ezaugarritzen dituen ekintza bat egotekotan, herrien arteko herri kirolena da hori.
Duela zortzi urte egin zen ekimen hori lehenbizikoz, jaien antolakuntzan dabilen Jesus Mari Bernaolaren esanetan. “Giroa animatzeko eta jendea erakartzeko helburuarekin egin genuen”. Trontza, sokatira, zokor apustua... hainbat proba egin behar izaten dituzte parte hartzaileek, eta hainbat herritako taldeek hartu izan dute parte, Lezama edota Larrinbekoak kasu.
Aurten, baina, ez da herrien arteko lehiarik izango. Zergatik? “Lezamarrak falta direlako”, erantzun du Bernaolak, “beste herri bateko proba batzuetara joatea hitzartua zeukaten deitu genituenean”. Hala eta guztiz ere, Bernaolak ziurtatu du datorren urtean berriz ekingo diotela proba horiek antolatzeari, “parte hartzaileak badaude noski”.