Tubos Reunidos enpresako langileek bi lankideen aurkako epaiketaren kontrako kanpaina hasi dute dagoeneko. Horretarako mobilizazio egutegia zehaztu eta epaiketara joateko autobusa antolatu dute. Hori ez ezik kamisetak ere egin dituzte; “Ni ere zubian egon nintzen, hitzarmen duin baten alde” leloarekin.
Irailaren 10ean epaituko dituzte Gasteizen Tubos Reunidos enpresako bi langile. Batek 2 urteko kartzela zigor eskaerari egingo dio aurre eta besteak 6 hilabeteko zigor eskaerari. Babesa emateko irailaren 8an eta 9an txanda bakoitzean ordubeteko lanuztea gauzatuko dute enpresan -12:00etan, 15:00etan eta 22:00etan- eta irailaren 10ean, epaiketaren egunean, 09:00etatik 12:00ak arte elkarretaratzea deitu du langile batzordeak epaitegiaren aurrean. Greba egingo dute egun horretan.
Bi atxilotu eta zauritu bat
Epaituko dituzten bi langileak 2012an egindako greban atxilotu zituen Ertzaintzak. Orduan, Tubos Reunidos enpresako langileek gogor salatu zuten poliziaren jarrera, atxilotutako behargin bat zauritu eta beste bost grebalari identifikatu baitzituen.