Ez da txikia euskal dantzek Amurrioko Jaietan duten garrantzia: 50. edizioa izango baitu aurten Aurresku eta fandango eta arin-arin Txapelketak. Lehiaketa zaharra da, beraz, baina oraindik ere osasuntsu dago. “Harrera ona izaten du, eta parte hartze handia”, ziurtatu du Aiara Dantza Taldeko kidea den Iraia Aspuruk.
Dantza talde horrek antolatu du lehiaketa azken 30 urteetan (taldea bera sortu zenetik bertatik). Lehenago nork antolatzen zuen, baina, ez dago argi. “Aiara Dantza Taldea sortu genuenean konturatu ginen lehiaketa jada bazegoela”, oroitu du taldearen hastapenetan aritutako Aitor Alavak, eta azaldu du aitzinean horrelako lehiaketak “modu espontaneoan” sortzen zirela, jai-giroan. “Badaude txistulari eta dantzari batzuen aspaldiko testigantzak, eta baita argazki zaharren bat ere”.
Dantza erakustaldia
Txapelketa abuztuaren 16an izango da, San Rokeko zelaietan. Egun bat lehenago, berriz, dantza-zaleek beste zita garrantzitsu bat izango dute, udaletxe aurrean: Aiara Dantza Taldeko kideen erakustaldia. “150-200 dantzari inguruk hartzen dute parte eta urtean zehar ikasitako guztia erakusteko erabiltzen dugu”, Aspururen esanetan.
Jendearen harrera “oso ona” dela azpimarratu du dantza taldeko kideak, “150 aulki jartzen ditugu eta hala ere beste bi errenkada gehiago osatzen dira”.