“Gu entzutera lehenbiziko aldiz gerturatzen direnak harrituta geratzen dira”. Hala ziurtatu du Christian Alemany-k, abuztuaren 14ko arratsaldean egingo den txistularien kontzertuaz galdetuta.
“Denetarik joko dugu”, aurreratu du kontzertuaren zuzendariak, “Itoitzen ‘Lo egin’ abestiaren bertsio batetik Austin Powers-en soinu bandaraino”. Ohiko euskal folk doinuak ere jorratuko dituztela gaineratu du musikariak, baina ‘Agur jaunak’ abesti klasikoari, adibidez, “ukitu berezi” bat emango diotela aurreratu du.
Amurrioko Musika Eskolak prestatzen du kontzertua. “Sei urte inguru dira emanaldia antolatzen dugula”, azaldu du Alemanyk, baina azpimarratu du “aspalditik” datorren zerbait dela Amurrioko Jaietako txistularien alardearen ekimena.
50 musikari inguru
Orotara 50 musikari inguru bilduko dira Guk eskulturaren aurrean kontzertua eskaintzera. Txistulariak amateurrak direla azaldu du Alemanyk, “emanaldirako abestiak ikasturte osoan zehar prestatzen dituzte, musika eskolan”. Hortaz gain, emanaldian bi abesbatzek hartuko dute parte: emakumezkoen batek eta umeen beste batek.
Baina kontzertuaren sonoritatea ez da txistu eta ahotsera mugatuko: baxu, gitarra, teklatu, bateria zein haizezko instrumentuz osatutako talde profesional batek emango baitio azken ukitua emanaldiari.