"Festak ospatu, animaliak askatu" lemapean elkarretaratzea deitu dute bihar, abuztuak 15 arratsaldeko 18etan, Amurrioko zezen plazan. Udalerrian zabaldutako deialdian tortura ez dela jai bat aldarrikatzen dute antolatzaileek. Ez da lehenengo aldia Amurrioko jaietan zezenketen aurkako mobilizazioak egiten direna. 2013 urtean herritar talde batek zezenketak diru publikoarekin ez finantzatzeko sinadura bilketa abiatu zuten eta 1427 sinadura batu zituzten.
Orain Amurrio taldea ere zezenketan aurka agertu zen jaien atarian bidalitako ohar batean: "Orain Amurriok justizia sozialean eta animaliekiko zein ingurumenarekiko justizian oinarritzen den jendartea eraiki nahi du, hori dela eta, animalien eskubideak urratzen dituzten ekintza guztien aurka gaude". Gainera, udalak diru publikoko ia 24.000 euro zezenketetarako edota animaliak tratu txarrak jasaten dituzten ekintzetarako erabiltzen dituela salatu zuen taldeak.
Amurrio Guk Bai taldeak ere oharra zabaldu du gaiaren inguruan eta ragarri du zezenketen edo jaien laikotasuna bezalako gaien aurrean erabakitzeko prozesu parte hartzaile lotesle bat abiatuko dutela, "amurrioarrek eurek erabaki dezaten euren jarrera, eta ez Euskadi zein estatu mailako alderdien irizpideen arabera".
Zabaldutako oharrean Amurrio Guk Bai taldeak adierazi du eurak ez direla ez kontra ez alde lerrokatuko amurrioarren iritzia jakin arte, eta beraz ez dutela zezenketen aurkako abuztuaren 15eko elkarretaratzea parte hartuko.