Asteartean egindako udal osoko bilkuran alkatearen, zinegotzien eta alderdien ordainsariak landu ziren eta beste hainbat herritan bezala -Artziniegan, Laudion, Okondon, adibidez- eztabaida piztu zen horren inguruan. Proposamenak aurrera egin zuen EAJ, PSE-EE eta Ppren babesari esker.
% 2ko jaitsiera
Josune Irabien alkateak eta Txerra Molinuevo alkate ordeak % 2an jaitsi dute bere soldata. Aurreko legealdian alkateak % 10ean murriztu zuen bere ordainsariak eta alkate ordeak, aldiz, % 37.
Indarrean dagoen legealdian alkateak 61.981,71 euro kobratuko ditu eta alkate ordeak 39.507 euro.
Neurri populista
Amurrio Guk Baik taldeak populistatzat jo zuen jaitsiera eta Amurrio Orainek azaldu zuen beraiek hauteskundetan gehiago murriztearen alde zeudela, 48.000 euroko muga jarriz. EH Bilduk adierazi zuen soldata garrantzitsua izanik ere, ordezkarien dedikazioa eta eraginkortasuna inportanteagoa dela.
PSE-EE eta PPk alkateak egindako proposamenarekin bat egin zuten. Josune Irabienek gaineratu zuen lotsagarria dela alkate batek bere soldata justifikatu behar izatea eta nabarmendu zuen badela garaia administrazioak soldata zehaztu dezan horrelako eztabaidak ekiditeko.
Alderdi eta zinegotzien ordainsariak
Asteartean onartutako proposamen harira hurrengoak izango dira zinegotziek izango dituzten ordainsariak, bakoitzeko 12 besterik ez dute kobratuko urtero:
-Tokiko Gobernu Batzordean parte hartzeagatik, 151,44 euro.
-Batzorde informatiboa lehendakaria izan gabe, 131,75 euro
-Bazorde informatiboa lehendakaria izanik, 457,56
-Udal osoko bilkuran parte hartzearen truke, 191,44 euro.
Horretaz gain, ordezkaritza duen talde bakoitzak 600 euro kobratuko ditu hilero eta zinegotzi bakoitzeko 185 euro.
Udal osoko bilkurak hilero
Aurreko legealdian Tokiko Gobernu Batzordeak hainbat eskumen izan zituen eta honetan bakarrik kontratazioena izango du.
Udal osoko bilkura izango da eskumen gehien izango duen atalak. Horregatik bi hilean behin egin ordez, hilero egingo dituzte.
Tokiko Gobernu Batzordeak osaketa zabala izango badu ere -EAJk bi ordezkari izango ditu eta EH Bilduk, Orain Amurriok, PSE-EEk eta PPk bana- Amurrio Guk Bai taldeak eskatu zuen bertan parte hartzea lekuko moduan gutxienez.
Partaidetza
Elkarte eta norbanakoen partaidetza udal osoko bilkuran eztabaidagai ere izan zen. Alkatetzaren proposamenak -onartutakoa, alegia- ez du jasotzen herritarren ekarpenak aktan agertu behar diren.
Oposizioko zenbait taldek azpimarratu zuten herritarrek parte hartzeko aukera izan beharko lukete. Hala ere, idazkariak gogoratu zuen legeak ez duela hori onartzen.