Argia astekariak Urko Apaolazaren artikulua argitaratu du, Frackinga eta Tubos Reunidos enpresaren inguruan:
"Amurrion lantegi nagusia duen Tubos Reunidos (TR) altzairu enpresak Ameriketako lurretan jarri ditu begiak. Cinco Días ekonomia gehigarriaren arabera AEBetan lantegi bat ireki dezake, “gas ez konbentzionala” fracking teknikaren bidez lortzen dutenen industrian buru-belarri sartzeko.
TRk soldadudarik gabeko hodiak ekoitziko lituzke haustura hidraulikorako. Plan horrekin aurrera segituz gero aurreikusten du salmentak %47 igotzea eta 2017rako etekin gordinak hirukoiztea (41,3 milioi euro).
Petrolio putzuetarako hodiak egiten ditu batik bat TRk eta aurten ikusi du nola petrolioaren merkatzeak kalte egin dion. Maiatza hasieran, akzionisten batzarrean azaldu zuen produkzio industriala mundu zabalean dibertsifikatu nahi duela menpekotasun horretatik irteteko. Estrategia horrekin dago lotuta AEBetan beste planta bat irekitzeko asmoa.
Ikusteke dago petrolio upela 60 edo 80 dolarretan mantenduko den edo epe laburreko prezio kointurala den, Arthur E. Berman mundu mailako geologo adituak esan duen gisan (ikusi horri buruz Pello Zubiriak idatzitako Net Hurbila). Bermanen ustez upela 90 edo 100 dolarretik gora igoko ei da eta frackingaren sukarra hasiko da berriz. Iragarpen hori beteko balitz, ondo kokaturik legoke TR.
Hala, 1.700 langile baino gehiago dituen eta Gasteizko Mercedesen ondoren Arabako esportatzaile handiena den enpresa kotizatuak, frackinga izango du oinarrietako bat, non eta teknika horrek herritarren gaitzespen erabatekoa duen lurraldean."