Gazte Alaiak Amurrioko Aisialdi Zentroak –Apdema– urtero ospatzen duen jaia antolatu du. Ospakizuna larunbat honetan, ekainaren 6an, izango da Aresketa Ikastolan eta Vitoria-Gasteizko, Laudioko eta Arabako Errioxako Apdemako zentroak gonbidatu dituzte jaira; modu berean, Menagaraiko Amor Misericordioso Zentroa, Orozkoko Ibarrako Jesús María Eskola (M.M. Mercedarias) eta Bilboko Aisialdi Zentroa ere gonbidatu dituzte. Guztira, 400 pertsona inguru elkartuko dira, xede bakar batekin: adimen urritasuna daukaten pertsonen integrazioa eramatea festa eremuan. Antolakuntzak Apdemako gazte eta adinekoen edo elkarte honekin zerikusia duten pertsonen arteko bilgune eta bizikidetza momentua izatea nahi dute.
Horretarako egitarau bat prestatu dute, goizeko 11:00etan hasiera emango diotelarik gonbidatutako pertsonen heltze eta ongi-etorriarekin, Juan de Urrutia plazan. Jarraian, poteoa egingo dute herrian zehar, musika animazioz lagunduta. Eta 12:45etarako Ikastolara igoera aurreikusita daukate herriko plazatik. Behin Ikastolan daudela, jaian parte hartuko duten 400 pertsona inguru horiei bazkaltzen emango diete, bazkal ostean musika izango dutelarik eta arratsaldea aurrera doan heinean odolosteak jateko aukera izango dute baita.