Eskualdeko herri guztietan bezala Amurrion gehiengo abertzalea sendoa da udalean. Egun 17 ordezkaritik 14 dituzte EAJk eta Bilduk, 7 bakoitzak hain zuzen ere. PPk beste 2 zinegotzi dauzka eta azkenik sozialistek daukate geratzen den eserlekua.
Azken urteetako emaitzeei erreparatuta, pentsatzekoa da alkatetza lortzeko lehia Josune Irabien jeltzalearen eta Eva Blancoren artekoa izango dela.
Irabienek azken 4 urteetan egindako kudeaketa eskaini du berme gisa eta Eva Blanco hautagaiak ordea, aldaketa eta eredu berriaren beharrean oinarritu du bere diskurtsua.
Alderdi berriak
Indarrean dagoen legealdian emandako oreka politikoa joera historiko luze baten ondorioa da, alderdien ordezkaritza antzekoa izan baita hamarkadetan.
Denboraren poderioz matendu den argazki politiko horretan aldaketak eragiteko ordea bi alderdi berri aurkeztu dira udalerrian, Orain Amurrio eta Amurrio Guk Bai.
Orain Amurrio Podemos-Ahal dugu Amurriok bultzatutako aukera politikoa da. Ikusteko dago Podemosek estatu mailan jasotako babesak Amurrion ere islarik izango ote duen. Amurriokoa da eskualde osoan Iglesiasek gidatzen duen alderdiaren babespean sortutako udal-hautagaitza bakarra.
Udal agertokira jauzi egin nahi duen bigarren talde berria Amurrio Guk Bai da. Parte hartzea da talde berriaren kontsigna nagusia eta Laudioko Omnia bezala, Ikune plataformaren parte da.