Amurrioko alkategaia Eva Blancok, Kike Fernandez de Pinedo Arabako ahaldungaiak eta Garazi Dorronsoro hautagaiak EH Bilduren aldeko boza eskatu dute Amurrion gaur.
Kike Fernandez de Pinedok hartu du hitza lehenik eta behin. Koalizio abertzalearen hautagaiak gogor kritikatu du PPren eta EAJren politika eredua eta biak zaharkitutzat jo ditu. Haiena Kutxabank, Garoña, fracking, multinazionalen eta porlanaren eredua direla ziurtatu du Fernandez de Pinedok. Horren adibidea Saratxoko errepidea dela adierazi du hautagaiak.
Berde, more eta gorria
Araba berde, more eta gorria eraikitzeko aukera bakarra EH Bildu dela aldarrikatu du Kike Fernandez de Pinedok. Koalizioaren proposamenen artean hurrengoak aipatu ditu: Trebiñu Araba bilakatzea, 1. sektorea babestea eta enpresa txikiekin elkarlanean aritzea multinazionalei lursailak eman ordez.
Euskararen aldeko mezua ere zabaldu du Fernandez de Pinedok.
Eredu berria
Ahaldungaiak behin eta berriro azpimarratu du Araba berria eraiki nahi duela EH Bilduk, Amurriotik hasita. Kike Fernandez de Pinedoren ustez EAJk Amurrioko udaleko leihoak eta ateak itxi ditu.
Eva Blancok ideia horretan sakondu du eta EAJri leporatu dio politika sozialak ez garatzea. Blancok adierazi du udal gobernu taldea ez dela oraindik ohartu Amurrion badagoela jendea txarto pasatzen krisiaren ondorioz.
Anbulatorioaren eztabaida aipatu du Eva Blancok nabarmentzeko bere ustez EAJk Eusko Jaurlaritzak aurrezteko egin duen proiektua ekarri duela herrira. Zentzu horretan ginekologia eta zerbitzu berriak bermatu behar direla nabarmendu du.
Horretaz gain, Eva Blancok erantsi du edukiak ez ezik politika egiteko modua ere aldatu nahi duela EH Bilduk, udala modu gardenean, parte-hartzailean eta faboritismoaren aurka kudeatuz.
Euskal gazteria
Garazi Dorronsoro Amurrioko hautagaiak gazteriaren partaidetza aldarrikatu du. Bere alderdikideak bezala euskal gazteriaren aurkako zapalkuntza salatu du eta igandean Gasteizen egingo den manifestazioan parte hartzeko deia zabaldu du.