Amurrioko Udalak Paisaia Plana egiteko esleipena gauzatu du. 12.874,40 euro balio izan du eta Eusko Jaurlaritzako Ingurumen Sailak diruz lagundu du.
Udalak espero du hilabete batzuren buruan bukatzea eta bide batez Tokiko Ekintza Planean txertatzeko aukera izatea.
Eremuak
Paisaiaren esparruan aurretik egindako txostenean jaso zuten esku-hartzeko larrialdiko eremu batzuk badaudela Amurrion. Hilerriko inguruak, Larrabeko zabortegi zaharra eta Nerbioko ertzak -Abiaga, Orue eta Ugartebetxi- hain zuzen.
Aldi berean Letobe, Mendigorri, Goikomendi eta Eskorlan ere paisaiaren ikuspegitik hobekuntzak egin beharko liratekela adierazi zuen txostenak.
Azpiegiturei dagokionez, Bilbo eta Valladolid lotzen duen oliobidean ere zenbait lan egiteko beharra nabarmendu zuen egindako txostenak.
Hori guztia jasoko du garatuko den Paisaia Planak.
Horren helburua izango da aipatutako eremuak mantendu eta babesteko beharrezkoak diren lanak proposatzea, planifikatzea, kudeatzea eta jarraitzea.
Josune Irabienek azpimarratu du garrantzitsua dela hobetu behar diren eremuak kokatzea etorkizunean berreskuratzeko. Paisaia herriko ondare naturala ere baita.