Podemos Amurriok adierazi du idazkari nagusia izendatu duela hauteskunde prozesua egin ostean. Angel Jimenezek izango du ardura eta horretaz gain hurrengo 3 urteetan antolakuntza eta ildo politikoa arautuko duen testua onartu dute.
Erabakitze esparru nagusiena Batzar Hiritarra izango da eta gaikako lan talde irekiak eta Koordinazio Batzordea -9 pertsonek osatutakoa- izango dute. Azken horiek arloen lana koordinatuko dute.
Hainbat arlo sortu dituzte: antolakuntza, gardentasuna eta partaidetza, politika eta tokiko ekintza, ekonomia, kontu sozialak, kanpo harremanak, zabalkunderako eta gainerako taldeekin harremana izateko arloa, kultura eta euskera, gazteria eta kirolak. Karguen iraupena mugatu dute.
Politikoki demokratikoak, justizia sozialaren aldekoak direla azaldu dute eta giza eskubideen errespetuari lehentasuna ematen diote. Aberastasunaren banaketaren, partaidetzaren, gardentasunaren eta erabakitze eskubidearen aldeko lana egingo dute. Berdintasuna eta zerbitzu publiko eta duinak ere aldarrikatu dituzte.
Guk Bai
Bestalde, Guk Bai tokiko zerrenda independenteak udal hauteskunderako programa jasotzen ari da. Herriak dituen beharretara egokitzeko amurrioarren partaidetza behar dute eta haien iritzia ezagutu nahi dute.
Duela bi hilabete hasi ziren elkarteekin bilerak egiten eta jende orori -elkarte, norbanako zein talderi- gonbidatu nahi dute ekarpenak egin dezan.
Horretarako otsailaren 6an lokala irekiko dute Boriñaur plazan, 2. zenbakian. Egingo dituzten deialdien berri emango dute kartelen eta sare sozialen bitartez.