Osakidetzak zabaldutako oharraren bitartez Jon Darpon Osasun Sailburuak iragarri du 2.700.000 euro inbertituko direla Amurrioko anbulatorio berrian.
12.000 biztanle ingururi emango die zerbitzua: “Amurrioko herritarrei ez ezik, osasun-zentroak inguruko udalerrietako biztanleei ere emango die arreta: Aiara, Artziniega edota Orduña.”
Darponek azaldu du hurrengo zerbitzuak eskainiko dituela: “osasun-arreta orokorra kontsultan eta etxez-etxe, arreta jarraituko guneak, prozedura diagnostikoak eta terapeutikoak, promozio eta prebentzio-jarduerak, haurtzaroko eta nerabezaroko arreta, emakumearen arreta, adinekoen eta helduen arreta, arreta aringarriak eta kirurgia txikiak, beste jarduera eta zerbitzu batzuen artean.”
Aspaldi iragarri zuten moduan, anbulatorioa leku berrian kokatuta egongo da eta sailburuaren aburuz erosotasun gehiago emango die erabiltzaile zein langileei.
Eusko Legebiltzarreko Osasun eta Kontsumo Batzordearen aurrean azaldu dute hori guztia Jon Darpónek eta Osakidetza Osasun Arretarako zuzendaria Antonio Arraizak.