Tentsioa areagotu da Amurrioko udal gobernu taldearen eta oposizioko alderdi garrantzitzuenaren artean. Aste hasieran Berdintasun Plana izan bada aurrez aurre jarri dituena, atzo EH Bilduk deitutako prentsaurrekoan anbulatorio berriari buruz mintzatu zen.
EH Bilduk azaldu nahi izan zuen bere jarrera anbulatorio berriaren inguruan. Mariano Alava zinegotziak azpimarratu du udalak sortu behar duen batzordea koalizioaren ideia izan dela. “Guk aurkeztu genuen mozioa anbulatorioaren inguruan eta gero EAJk testu alternatiboa aurkeztu zuen, ez da haien iniziatiba izan” adierazi zuen EH Bilduko ordezkariak.
“Hori bai, guk jasotako aldarrikapenak leundu ditu udal gobernu taldeak” salatu du Alavak. EH Bilduren mozioak batzordea herritarrei ireki nahi zien. Aldi berean, herritarrekin anbulatorioan eman behar diren zerbitzuak eta kokapena ere eztabaidatu nahi zuen EH Bilduk batzorde horren bitartez.
“Kontua ez da bakarrik eraikin berria izatea, zerbitzu gehiago ematea baizik. Ginekologia zerbitzua beharrezkoa da Amurrion” erantsi zuen Eva Blanco zinegotzi eta legebiltzarkideak.
Bukatzeko, koalizioaren asmoa zen herritarren iradokizunak Osasun Sailari helaraztea, aintzat har ditzan Plan Funtzionalean. “Baina horri uko egin dio EAJk, amore eman du ezer egin baino lehen” esan zuen Mariano Alavak.