Amurrioko Udalak sakelakoentzako aplikazio elebiduna garatu eta plazaratu du. Partaidetza arloaren egitasmoa izan da eta bere helburua da herritarren kexa eta iradokizunak jasotzea. Modu horretan garbiketa arazoak, kaleetan eman diren kalteak edo antzeko gertakariak jaso eta kudeatuko ditu “auzobegiraleak”.
Udalak uste du komunikazioa arintzeko aukera egokia izan daitekeela.
Dagoeneko google play zerbitzuaren bitartez lortu daiteke aplikazioa Android sistema erabiltzen duten telefonoentzat; “amurrio” hitza bilaketan erabiliz instalatzeko aukera dago.
Aplikazioaren funtzionamendua oso erraza da. Posta elektronikoaren helbidea soilik behar da instalatzeko eta behin hori eginda herritarrak zerbait egoera txarrean topatzen badu herrian, argazkia atera diezaioke eta bidali. Aplikazioak geolokalizatuko du automatikoki.
Gertakarien jarraipena
Gertakariaren berri eman ostean “auzobegiraleak” erantzungo dio herritarrari posta elektronikoaren bitartez. Hala ere, herritarrek ere gertakarien jarraipena egin dezakete. Guztiak argitaratuko baitira amurrioincidencias.org web-atarian.
Erabilera gehiago
Iñigo Bordes zinegotziak gogoratu du aplikazioak udalaren web-atarian argitaratzen dituen albisteak, agenda kulturala, botiken informazioa eta zenbait telefono ere jasotzen dituela.
Laster IOS sistema erabiltzen duten gailuentzako bertsioa ere zabalduko dute.