Amurrioko koadrilen arteko Puntazo Eguna jaialdia antolatzen duen batzordeak dagoeneko aurtengo egitaraua kaleratu du.
Aurten urtarrilaren 31n ospatuko den urteroko Amurrioko jaialdiak, egitarau oparoa eskainiko du berriro.
Goizetik hasita, 12:00ak aldera konkretuki, herrian trikipoteoa antolatu da eta 13:00ak aldera jaialdiari hasiera emateko txupinazoa ere jaurtiko dute.
14:30ak aldera jaialdia bere urteroko gunera hurbilduko da, Matias Landaburu ikastetxeko frontoira zehazki. Bertan, herri bazkaria egongo da.
Herri bazkarirako tiketak aste honetatik aurrera Rinconcito eta Txokogorri tabernetan salgai jarriko dira 10 euroren truke.
Bazkalostean, 16:00etan eta 18:00etan zehazki, aurtengo bi ekintza sorpresak burutuko dira; “txipiroia” eta “puntazo momentua” izendatutakoak.
Arratsaldeko 19:00etan herriko tabernetan batukada poteoa ere antolatu dute eta, jaialdiari amaiera emateko, gau osoan Matias Landaburun hiru kontzertu antolatu ditu batzordeak, 22:00etan hasita.
Alde batetik, Amurrio eta Bilboko kideak dituen Monkey Painters taldea arituko da. Ostean, Errekalde auzoko Zea Mays talde ospetsua eta, jaialdiari bukaera emateko, Akerbeltz erromeria.