Amurrioko antzokia jendez lepo egin zuten atzo "Ene begiak eme" ikuskizuna. Eskualdeko 250 lagun bertaratu ziren 40 artisten emanaldia ikustera. Esti Bilbao eta Nerea Puentek jaiotza oholtzaratu zuten haurrek gurasoei kontatzeko ipuina entzuten zen bitartean haurdun dagoen emakumearen tripan marrazkiak eginez. Haurtzaroan mutil eta neskek bizi duten egoera ezberdinak taularatzeaz Falu, Arene eta Izaro arduratu ziren, jostailu ezberdinak aldean flauta trabesera eta kitarraren soinuek Mikel Laboaren "Zilborhesteak" kanta jotzen zutela. Ondoren, Aresketa Gimnasia erritmikoko bi kirolari ohi atera ziren, Zea Maysen bertsioan abesti berdina uztai eta xingolekin dantzatzera. Mari Garamendi eta Libe Kerrorumek ilargiak emakumeengan duen eragina irudikatu zuten antzerki bidez, hilerokoa eta hamaika emozio plazaratuz. Oreka eta emozioek Ander Goti eta Nerea Iglesiasekin izan zuten segida, eszenatokian soka baten gainean batetik bestera ibili baiziren. Segidan, Artziniegako Bleibet abesbatzako hainbat kidek publiko artetik abestu zuten "Hegoak ebaki banizkio" kanta ezaguna. Ostean, antzerkiaren txanda iritsi zen, emakumeei erantsitako estereotipoak biluztuz. Igor Arzuaga musikariaren erritmoz lagunduta, kontaktu dantzaz gozatzeko aukera ere izan zuten ikusleek. Leire eta Zaloa Sanjurjo ahizpek dantza tradizionalak eta modernoak nahastu zituzten txalaparta soinuekin. Jabi Isasi eta Jessi Picatostek, aldiz, maitasunaren inguruko ipuin musikatu bat kontatu zuten. Arantza Arrizabalagak, ordea, zahartzaroa irudikatu zuen, sofan eserita album bat eskuan pantailan haren bizitzako hainbat argazki -txikitatik gaur egun arte- ikusten ziren bitartean. Emanaldiari amaiera Uluka taldeak eman zion "Morez" kantarekin. Datozen asteetan argitaratuko da "Ene begiak eme" ikuskizunaren DVDa.