Amurrioko udalbatzak LOMCE lege proiektuaren kontrako mozioa onartu berri du, EAJ eta Bildu udal taldeen aldeko botoekin. Amurrioko PPko bi zinegotziek aurka bozkatu zuten eta PSEko ordezkaria abstenitu. Mozioa hezkuntza munduko hamaika banako eta eragile biltzen dituen LOMCE Gabeko Herria plataformak aurkeztu du eta EH Bilduk udalbatzara eraman.
Herriko udal ordezkari politikoek adosturiko adierazpenaren arabera erreforma proiektu berri hau pertsonen hezkuntzarako eskubidearen aurkakoa da “eskola inklusiboa baztertzen duelako, autoritarioa eta segregatzailea delako, euskara eta euskal kultura alboratzen dituelako, hiritarren eta familien partehartzearen aurka egin, erlijioa inposatu, ikasleriaren norbanakotasunetatik aldendutako hezkuntza bat derrigortzen duelako, sistema merkantilistaren beharrizanei erantzun nahi dielako eta beste arrazoi askorengatik”. Era berean, LOMCE gizartearen gehiengoaren nahien aurka dihoala adierazten dute.
Honenbestez, Amurrioko Udalak, mozioaren onarpenaren ondotik, honako neurri hauek onartuko lituzke: LOMCE Gabeko Ekimena eta erreforma legearen aurka bideratzen diren ekimen guztiekiko babesa eta lege proiektuaren aurkako posizionamendu instituzionala.