Ostegunean egindako udal osoko bilkuran erabaki behar zuten alderdiek Mendiko 3 kalean dagoen orubearen erabilera zein izango den.
Udal Gobernu Taldearen, hau da, EAJ, asmoa da lursaila Amurrioko anbulatorio berriaren eraikuntzara bideratzea eta horretarako prozedurak aurre egin behar zuen.
Hala ere, oposizioan dauden talde guztiek gaia mahai gainean uztearen alde bozkatu zuten. Ondorioz, prozedura bertan behera geratu da momentuz.
Alkatearen kontrako iritzia
Josune Irabien Amurrioko Alkateak desadostasuna adierazi du erabakiaren aurrean. Bere ustez ulertezina da herriari onurak ekarriko dizkion proiektua gelditzea eta erabakiaren atzetik alderdien interesak daudela azaldu du.
Irabienek esan du hauteskundeen gertutasuna dela eta oztopatu dutela anbulatorioaren espedientea. Jeltzaleak gogoratu du Eusko Jaurlaritzak bitartekoak bideratu dituela proiektua gauzatzeko asmoarekin.
Informazio gehiago eskatu du EH Bilduk
Gaia mahai gainean uzteko deia EH Bildu taldeak egin du eta hori dela eta bere jarrera azaldu du oharraren bitartez.
Koalizioak aipatu du eztabaida ez dela anbulatorio berri eta handiagoa izatea, baizik eta zer zerbitzu mota emango diren bertan. EH Bilduren aburuz anbulatorio berria eraikitzeko prozesua ez da gardena izaten ari eta talde politiko eta herritarren partaidetza beharrezkoa da.
Zentzu horretan, taldeak salatu du antzinako eskaera ez duela jasotzen anbulatorioaren Plan Funtzionala, ginekologia zerbitzua, alegia.