Azaroaren 20 eta 21ean epaituko dute Aletxu Zobaran aiaraldearra epaitegi zentzatzaile bidez. Epaiketa Parisen izango da eta familia eta lagunarteko kideek adierazi digutenez, fiskalaren eskaera bista hasten denean ezagutuko da.
Printzipioz hamar urtetik beherako zigor eskaera aurreikusten dute, izan ere, zuzenbide penalak ez bezala, zentzabidez eginiko epaiketek gehienezko hamar urteko zigorra baitute.
Hiru urte eta erditik gora daramatza Lyon-Corbaseko espetxean, 2011ko martxoan Belgikatik gertu dagoen Willemcourt herrian frantziar poliziak beste hiru ustezko ETAko kideekin batera atzeman zuenetik. Bertan diren euskal presoek, hainbatetan salatu izan dute kartzelazainen aldetik izandako probokazioa eta pairatutako egoera.
Lagunarteak adierazi duenez "Aletxu etxetik 1000 kilometro baino gehiagora dago espetxeratua" eta urrunketaren "ondorio latzak" nabarmendu dituzte, duela astebete eskas "preso baten senideek errepidean izandako istripu larria" kasu.
Hori dela eta, epaiketara gerturatzeko deia ere zabaldu dute, izena ematen duen jendearen arabera autobus edo furgonetetan joango litzateke; irteera azaroaren 19an eta itzulera 21 edo 22an litzatekeelarik.