Artzain Eguna artzainek egiten duten lana omentzeko eta nekazaritza eta abeltzaintza ere bultzatzeko jaia da. Horrela, artzaintzaren munduarekin lotutako jarduera ugari eskainiko dira irailaren 21ean, igandea, goizeko 10:00etatik hasita Artzain txakurren txapelketa bukatu arte.
Guztira, hiru txapelketa egongo dira: Ardi Latxaren Herrialde Arteko XXI. Txapelketa eta Idiazabal Jatorri Izeneko Ardi-Gazta VIII. Txapelketa 10:00etan hasiko dira eta Artzain Txakurren XVI: Txapelketa 18:00etan.
Bestalde, artzainek gazta egiteko erabiltzen duten prozesuaren erakustaldia egongo da, ardiei ilea mozteko teknikak erakutsiko dituzte eta artzain-produktuak dastatu eta erosi ahal izango dira.
Gainera, urtero bezala Arabako artzainei omenaldia egingo zaie eta aurten Araiako Maribel Saez de Zuazola, Inosoko Jose Luis Ortueta eta Amurrioko Begoña Menoyo omenduko dituzte “bizitza osoan egindako lanagatik”.
Artzain Eguna orain dela 21 urte sortu zen ardi latxaren artzaintza jendeari ezagutarazteko eta artzainek egiten duten lana omentzeko asmoz, azken hauek egiten dituzten produktuak zabalduz.