Saratxon kokatuta dago Deguisa lantegia, erregogorren inguruan aritzen da eta hainbat aplikazio industrialetarako produktuak ekoizten ditu. Hitzarmen kolektiboko epea gaindituko dute aurten eta hori dela eta, enpresa eta langileen ordezkariek negoziaketak abiatu zituzten; momentuz adostasunik lortu ez dela eta, irailaren 2tik aurrera greba mugagabea abiatu dute bertako langileek.
Miguel Burdallo, enpresa-batzordeko presidentearen hitzetan, langileak 2008. urtetik soldata igoerarik gabe egon dira "galdutakoa berreskuratzeko apostua egin behar dugu" adierazi du ordezkariak. Horrekin batera ultraaktibitatea bermatzeko eskaera era luzatu du "Egungo hitzarmena abenduaren 31an amaitu eta zuzenean estatuko beira eta zeramikaren hitzarmenera pasako ginateke, %35eko diru galerarekin" gaineratu du Burdallok.
Gauzak horrela hirugarren greba eguna bete dute gaur Deguisako langileek, akordiorik lortu ezean luzatu daitekeen egoera da. "Enpresak inolako jarduerarik ez duela" nabarmendu du enpresa batzordeko presidenteak, eta langileek emandako erantzuna oso positibotzat hartu du.
Grebak aurrera jarraitzen badu ere, enpresa eta langileen ordezkarien arteko negoziaketek aurrera jarraitzen dute, azken hartu-emanetan enpresak %0.5 eta %1eko igoera eskaintzen zuen langileentzako; kontuan izan behar dugu eskala bikoitza ezarrita dagoela enpresan; langileen ordezkariek ordea, %1.5 eta %3.5eko igoera eskatzen dute.