Aurreko ikasturteko dantzariek gaur hasi eta irailaren 11ra bitartean eman ahal izango dute izena. Ikasle berrientzako epea,berriz, hil honetako 15ean hasi eta 30era arte luzatuko da. Horretarako, bada, ikastaro-mota bakoitzari dagokion kuota ordaindu beharko da kontu-korronte honetan: 3035 0089 140890704884 (Laboral Kutxa), dantzariaren izen-abizenak zehaztuta. Halaber, dantzari berriek “B” jarri beharko dute izenaren aurretik.
Aurreko urteetan bezalaxe, hainbat ikastaro eskainiko ditu Aiara Dantza Taldeak. Batetik ume eta gaztetxoentzako ikastaroak eta, bestetik, helduei zuzendutakoak.
Haur eta gaztetxoentzako ikastaroak
Haur berriek bost urtetik aurrera eman ahal izango dute izena (2009an jaiotakoak), eta euren ordutegia honako hau izango da: astelehenetan eta ostiraletan 17:15etik 18:15era. Ikastaro honen prezioa 30 eurokoa da. Dantzari berriak urriaren 3an hasiko dira. Aurreko urteetako dantzariei, berriz, euren irakasleak emango die ordutegia eta, edonola ere, irailaren 12an hasiko dira.
Dantza plaza
Helduentzako talde honetan, erromerietan dantzatu ohi diren erritmoak ikasiko dira, askotan rock and rollaren moduko erritmoak baliatuz horretarako. Larunbatetan emango da ikastaroa, 13:00etatik aurrera, eta haren prezioa 20 eurokoa da. Eskolak urriko lehenengo asteburuan hasiko dira.
Helduak
Talde honetako helburu nagusia erromerietarako dantza errazak ikastea den arren, plazarako taldeko dantzak ere ikasiko dituzte ikasleek. Era berean, Aiara Dantza Taldearen emanaldieten dantzatzera ere bideratuko dira eskolak, eta nahi izanez gero, horietan parte hartzeko aukera emango zaie ikasleei. Ikastaroaren ordutegia hau izango da: asteazkenetan, 18:15etik 19:15era, eta prezioa 30 euro. Urriaren 8an hasiko dira eskolak.
Taldearekin harremanetan jartzeko, erabili helbide elektroniko hau: aiaradantzataldea@gmail.com, edo deitu telefono hauetara: 688 66 25 54 (Igone) eta 661 37 85 96 (Amaia).