Amurrioko Jaiek herriko mugak gainditzen dituzte azken bi egunetan. Herriko ohiko kale eta plazetatik urrundu eta kanpoaldean dauden San Roke zelaietara hurreratzen da festa.
Bertara igotzearen ohitura noiz sortu zen zehaztea zaila da. Ohitura zaharra izango da, kontuan hartuta bertan egiten den Bakailao Lehiaketak 38. edizioa beteko duela aurten. Tortilla txapelketak ere baditu urteak, baina denbora nahiko egon zen egin gabe, harik eta berreskuratu zuten arte, duela hamabost urte. Mendiko Lagunak da lehiaketa horiek eta San Rokeren Errepikapenaren Eguna orokorrean antolatzen dituen elkartea. 1976an ekin zion Bakailao Txapelketa egiteari. Ekitaldi gastronomiko bat egitea baino, “mendizaletasuna eta euskal kultura” sustatzea zen lehiaketaren helburua, mendi taldeko kide den Patri Aldamaren arabera. Gauzak hala, Franco hil osteko urte horietan Egan bezalako taldeen kontzertuak antolatu zituztela oroitu du Aldamak.
Helburu berdinak
Ordutik hona euri asko egin du: San Rokeko zelaietara joan zein bertatik herrira itzultzeko autobusak antolatzen dira eta jada ez da Errepikapena San Roke egunaren osteko igandean ospatzen, Sanrokeak izan eta hurrengo egunean baizik.
Baina, aldaketak aldaketa, helburua berbera izaten jarraitzen duela azpimarratu du Aldamak: “gure kulturaren, euskal kulturaren, zati bat bizirik mantentzea”.
Gaurko egitaraua:
8:30 - 15:00 eta 17:00-19:30// San Rokeko zelaietara joan eta etortzeko doako autobusa.
9:00// Bakailao eta patata-tortilla lehiaketarako izen-ematea.
11:30// MEZA NAGUSIA, Mariaka Abesbatzarekin.
14.30// SARI BANAKETA.
14:30// ANAITASUN BAZKARIA
16:00// ERROMERIA San Rokeko zelaietan “OROTS” taldearekin.
19:00// FUTBOL PARTIDA, Basarteko futbol zelaian, Amurrio Klubak antolatuta. Doako sarrera.
20:00// “LA CONGA” kale ikuskizuna.
20.00// J.J. VAQUEROren bakarrizketak Amurrio antzokian.10€
22:00// DANTZA PLAZA PATXI PEREZ ETA KONPAINIAREKIN, Juan Urrutia plazan.
23:30// IGUARRAKOAREN AGURRA EGITEKO DESFILEA.
24:00// HERRIKO JAIEN AMAIERA. Iguarrakoaren itzulera.