Tradizio handiko lehiaketak izan ohi dira marmitako lehiaketak. Laudioko Latiorro auzokoak, adibidez, XXV. edizioa egingo du aurten. Zifra handi horrek kontrastea egiten du Amurrioko Marmitako Lehiaketarenarekin: aurtengoa V. edizioa izango baita. Adin berbera du txapelketa antolatzen duen gastronomi elkarteak: Su Gozotan elkartea kozinatzea afizio komun zuen Amurrioko lagun talde batek sortu zuen.
Elkartea sortu eta berehala ekin zioten marmitako lehiaketa antolatzeari. Izan ere, herrian ez zegoen halako ekimenik. “Hutsune bat nabaritzen genuen”, azaldu du elkarteko kide den Itxaso Urretak. Eta badirudi ez zirela halako gastronomi topaketa baten beharra ikusten zuten bakarrak, txapelketaren lehen edizioak “arrakasta handia” izan zuela oroitu baitu Urretak. Ordutik hona ospatu dituzten edizioetan ere jarri dituzten mahai guztiak bete dira.
Aitor Martinez epaimahaian
Marmitako Lehiaketa, berria izateaz gain, aurten nobedadeekin datorrela azpimarratu dute Su Gozotan elkarteko kideek: ETBko Sukaldari saioan garaile izan zen Aitor Martinez urduñarra epaimahaian arituko baita.
Sukaldaritza txapelketak antolatzea soilik ez, kozinatzea ere gogoko dute elkarteko kideek. Hala, Aiara Dantza Taldearen 30. urteurrenaren bazkaria prestatzen aritu ziren, eta halako gehiago egiteko asmoa dutela adierazi dute.