1966. urtean izan zen Amurrioko Koadrilen arteko lehenbiziko lehiaketa. Harrigarria baldin bada halako ekimen bat Frankismoaren garaietan egin izana, are harrigarriagoa suertatzen da lehiaketa hori Udalak berak antolatu zuela jakitea.
Ez ziren garai errazak izan. Gatazkak egon ziren, baita istorio xelebreak ere. Garai horretan sortu zen Euskotarrak koadrila. Talde horretako kide den
Txotxe Plaza liburu bat idazten ari da, garai horretako pasadizoak bilduko dituena.
Lau izan ziren 1966ko lehiaketa hartara aurkeztu ziren koadrilak: Los Intocables, El follon, Trot-Art eta Euskotarrak. “Euskotarrak-eko kideok argi geneukan euskaltzaletasuna aldarrikatu nahi genuela”, oroitu du Plazak. Sentimenduen plazaratze horretan musikak bereziko garrantzia izan zuenEuskotarrakekoentzat.
“Eusko Gudariak” eta antzeko abestiak abesten zituzten. Instrumenturik ez zutela eta, Orozkoraino joan behar izaten ziren txistu bila. Hortik sortuko zen gero Amurrioko Txistu Eskola. Baina Plazak ez du gauza gehiago aipatu nahi izan, datorren urtean argitaratzeko asmoa duen liburuan jasoko baititu kontu horiek guztiak.
Los Intocables koadrila lehiaketa izan eta urtebetera desagertu zen eta El Follón ere duela hamabost urte disolbatu zen. Koadrila berriak sortu dira, ekintza berriak tradizio bilakatu... “Lehen ilusio bereziarekin bizi ziren jaiak”, oroitu du Plazak, “gauza asko aldatu dira”.