MADDI ISASI (Amurrio, 1995) Jai Herrikoien aldeko Batzordean dabil. Urtero lez, jaietarako egitarau propioa aurkeztu du batzordeak.
Zer nabarmenduko zenuke egitarauaren aldetik?
Urte orotan nabarmentzen duguna, jai egitaraua herriko hainbat elkarte eta eragilek aurrera atera dugula. Herrikoia eta parte-hartzailea dela. Koadrilen arteko egunean gymkana egingo da, adibidez.
Nik uste bilakaera positiboa izan dugula, urte batzuk daramatzagu egiten eta erreferentzia da herrian. Urte pilo eman dira lanean eta jendeak parte hartzen du. Herriko erreferentea bilakatu da Jai Herrikoien aldeko egitaraua, garatzen doa eta urtero gero eta elkarte gehiagok parte hartzen dute.
Gazte Egunaren harira zer edo zer aipatuko zenuke?
Abuztuaren 13an izango da eta egun horren helburua da herriko gazte guztiak batzea. Horretarako herriko gazte asanblada, Ernai eta Ikasle Abertzaleak taldeek egitaraua osatzen dute. Goizean hasiko da eta gazteek antolaturik herriko gazte guztientzat da.
Zein da Jai Herrikoien aldeko Batzordearen osaketa?
Elkarte pilo daude Jai Herrikoien aldeko Batzordean, mota askotakoak: kirol elkarteak, jaietako koadrilak, txosna-gunea... Urtean zehar eta gehienbat jaiak hurbiltzen diren neurrian bilerak egiten ditugu egitaraua zehazteko eta guztia partaidetzan oinarritzen da.
Zein da zabaldu nahi duzuen mezua?
Guk jendea ondo pasatzea nahi dugu eta gonbidatzen dugu egitarauan parte hartzera eta ahal duen ekarpena egitera.