Eusko Jaurlaritzak Amurrion eraiki nahi duen anbulatorio berriaren inguruko hainbat xehetasun jakinarazi ditu Josune Irabienek, Radio Llodion egindako adierazpenetan.
Anbulatorioa Urrutia Parkean dagoen Azkarraga baserri zaharraren lur-eremuan kokatuko da. Irabienek adierazi du hiru zirela anbulatorioaren balizko kokaleku gisa planteatzen ziren tokiak: anbulatorio zaharraren ingurua, Landako kalea eta azkenik kokaleku gisa hautatu dena. Azkarraga baserriaren eremua “gertutasun irizpideak” kontuan hartuta hautatu da, alkatearen hitzetan. Lur-eremu hori Eusko Jaurlaritzako Etxebizitza Sailarena da, eta orain Osasun Sailera igaro behar da jabetza. Jabetza departamentu batetik bestera igarotzearen prozesuak “denbora” beharko duela azaldu du Irabienek, eta urte bukaerarako albiste gehiago egotea espero duela gaineratu du.
Bere garaian Etxebizitza Departamentuak Azkarraga baserriaren lur-eremuan gazteentzako etxebizitzak egiteko asmoa zuen, baina krisiagatik asmo horiek bertan behera geratu ziren.
Oraingoaren bikoitza
Irabienek aurreratu du anbulatorio berriak 1200 metro karratu izango dituela, solairu bakarrean. Oraingo anbulatorioak 600 metro karratu ditu, berriak izango lituzkeenaren erdia. Espazio faltagatik hainbat modulu gehitu zizkioten eraikinari 2008an.
Hala ere, eraikin berrian ez dago, printzipioz, espezialitate berririk sartzeko asmorik. Gaur egungo anbulatorioan dauden berdinak egongo lirateke, beraz: medikuntza orokorra, pediatria, erizaintza eta emagina.
Osasun Sailak 330.000 euro erreserbatu ditu aurtengo aurrekontuetan proiektua aurrera eramateko.