Orain gutxi aiaraldea.com-ek jaso zuen "Alde batera" proposamenak irabazi zuela San Anton plaza estaltzeko lehiaketa. Amurrioko EH Bildu, ordea, ez dago ados prozesu horretan jarraitu diren irizpideekin.
Bidalitako prentsa-oharrean adierazi dutenaren arabera, “opakutasunaz eta presaz jokatu du PNVk” eta “auzokideen iritziari jaramonik ez” zaiola egin eta “prozesu parte-hartzaile bat faltsutu” dela gaineratu dute.
Hasiera batean 65 proiektu aurkeztu ziren Udalak deitutako ideia-lehiaketara. Gero, apirilaren 14an, epaimahaiak horietatik bost aukeratu zituen, eta, herritarrek, hain zuzen, bost horietatik gustukoen zutena zein zen adierazteko aukera izan zuten maiatzean zehar. Dena den, EH Bilduk dio epaimahai hori itxia izan zela, oposizioko kideek ez baitzuten parte hartzeko aukerarik izan, eta alkatea izan baitzen epaimahaiburu. Gainera, salatu du prozesua ez dela benetan parte-hartzezkoa izan, 200 lagun ingururen iritzia jaso bazen ere, “azkenean herritarren babes handiena lortu zuen proiektua aukeratu beharrean, epaimahaiak beste ideia bat aukeratu baitu”.
Hain zuzen, proiektu hori Amurrioko Udalean tratatu zenerako EAJk eta PPK Arabako Biltzar Nagusietan aldez aurretik lotuta zutela uste dute EH Bilduko ordezkariek. Haien hitzetan,” obra hau PNVk eta PPk Gasteizen negoziatu zuten itunean sartu zen, De Andresek 2014. urtean aurrekontuak izan zitzala ahalbidetzeko”.
San Antongo proiektua, ordea, ez da lehentasunezkoa Amurrioko EH Bildurentzat, eta ildo horretan zera adierazi dute: “beharrezkoak eta premiazkoak diren inbertsioek, Larrabe auzokoek kasu, egin gabe jarraitzen dute aurrekontu faltagatik”.
Bestalde, aukeratutako proiektuaren gainean zer iritzi duen ere adierazi dute prentsa-oharrean. Haien ustez, alderdi historiko eta kulturalak alde batera utzi dira, eta estetika baino ez da balioetsi.