Edateko uraren hornikuntza-zerbitzuaren eta estolderia-zerbitzuaren gaineko tasak igotzea onartu zen iragan ostegunean Amurrioko Udal-osoko bilkuran. Udal-gobernuak aurreratu zuenez, igoera euro batekoa izango da hileko etxeen esparruan edateko uraren hornikuntzaren kasuan. Estolderia-zerbitzuagatiko tasaren igoera, berriz, hilero 0.65 euro gehiago ordaintzea ekarriko du, udal-gobernuaren hitzetan.
Gobernu taldeak bi arrazoi baliatu zituen igoera arrazoitzeko. Alde batetik, Europako zuzentarauak 2015rako uren gaineko zerbitzuak defizitarioak ez izatea eskatzen du. Udal-gobernuaren hitzetan, Amurrion eskaintzen den zerbitzuaren kostua hiritarrek tasen bide ordaintzen dutena baino ia %50 gehiago da. Igoera graduala izango dela ere gaineratu zuten EAJko gobernu taldetik. Hala, datozen urtetan zehar antzeko igoera gehiago egingo direla aurreratu zuten, Europako zuzentarauaren betekizuna “2018. urtearen amaierarako betetzen laguntzeko”.
PPk aurka, PSE-EEk eta Bilduk abstentzioa
Igoera biak EAJren aldeko bozekin onartu ziren arren, proposamenak ez zuen gainontzeko alderdien adostasuna lortu. PP-ko bozeramaileek igotzearen aurka bozkatu zuten, igoerak beti irizpide berdinen bidez egin beharko liratekeela argudiatuz. “Urte batzuetan ezer igo gabe gabiltza, eta gero urte batetik bestera ehuneko altu bat igotzen dugu”, adierazi zuen Alderdi Popularreko zinegotzi den Monserrat Canivek. Bere hitzetan, proposatzen den igoera %50koa baino gehiagokoa da kasu batzuetan. Ehunekoez hitz egitea oso “tranpatia” zela erantzun zioten EAJtik, ehunekoak altuak izan arren igotzen diren kopuruak txikiak direlako.
PSE-EE eta Bildu, euren aldetik, abstenitu egin ziren. PSE-EEeko zinegotzi Irene Novalesek adierazi zuen ura igotzearen alde zegoela, baina igoerak “familia askori min” egingo ziela gaineratu zuen, eta errenta baxuenentzako abantailak ezartzea bota zuen faltan. Bildutik, berriz, adierazi zuten zerbitzu publikoak ez dutela zertan errentagarriak izan, eta onartutako igoera “zerbitzu publikoen aurka ematen ari diren erasoekin” lotu zuten.
Zinegotzi berriak
Uraren igoera onartzeaz gain, PSE eta PPren zinegotzi berriei ongietorria egin zitzaien Udalbatzan. Irene Novalesek Roberto Gonzalez ordezkatu zuen PSEren aulkian. Jerome Jarrisek, aldiz, Santiago Abascal ordezkatu zuen PP-n.
Hortaz gain, Jon Toquero Albizua EAJko zinegotziaren azken Udalbatza izan zen, jubilatua dagoenez kargutik ere erretiratzea erabaki duelako.