Amurrioko Udalak prentsa-ohar bidez adierazi du “San Anton Plazako Estalkia” lehiaketako epaimahai kalifikatzaileak aukeratu duela jada zein proposamen izan den garailea. Proposamenari Alde batera deritzo, eta egileak bi hilabete izango ditu orain eraikuntza-proiektua idazteko. Gauzak ondobidean, beraz, proiektua eta pleguak uztailerako onartuko ditu Udalak, obrak lehenbailehen lizitatu ahal izateko. Hala, bada, eraikuntza-lanak azaroan hastea eta datorren urteko maiatzerako amaitzea espero dute udal-ordezkariek.
Alde batera proposamenean jasotakoaren arabera, oraingo estalkia eraitsi egingo da. Haren ordez jarriko den estalkiaren kanpoko azala polikarbonatu zeharrargikoa (transluzidoa) izango da, eta Amurrio inguruko pinu-zuraz egindako xaflez osatua egongo da.
Hasiera batean 65 proiektu aurkeztu ziren Udalak deitutako ideia-lehiaketara. Gero, apirilaren 14an, epaimahaiak horietatik bost aukeratu zituen, eta, herritarrek, hain zuzen, bost horietatik gustukoen zutena zein zen adierazteko aukera izan dute maiatzean zehar.
Azken hitza, dena den, lehiaketako epaimahai kalifikatzaileak izan du. Izan ere, Alde batera ez da izan herritarren proiekturik gustukoena, baina azkenean hura izan da garailea, epaimahaiak hala erabakita.