Maiatzaren 18an, igandea, ospatuko dute Amurrioko Txakolin Egunaren XVI. Edizioa. Arabako Txakolinak du protagonismo osoa jaian, baina tokiko ekoizleek, artisauek eta hainbat elkartek ere bere lekua izango dute jaian.
Dagoeneko Txakolin Egunari lotuta dagoen ekintza bat -hitzaldia- egin dute, baina igandean egitarau gehienaren txanda helduko da.
10:30ean udaletxean mahats-biltzearen aurkezpena egingo dute. Ordu erdi geroago Carlos Larrinagari hil ondoko saria eta aurreskua izango da. Eta 11:30ean hasiera emango diote jaiari txupinaren bitartez.
Orduan txakolin eta tokiko ekoizleen produktuak erosteko eta dastatzeko aukera egongo da Amurrioko Juan Urrutia Plazan eta Larrinaga kalean. Antolakuntzak bere standean Basatxerri, Label kalitatezko Oilasko Lumagorria, Kantauriko antxoak, txitxi-burruntziak, Label kalitatezko Euskal Hanburgesa, Amurrioko odolostea, txistorra, saltxitxa zuriak eta kreole txorizoa jateko tiketak salduko ditu plazan.
Garrafa lehiaketa
Bestalde, Aiaraldeko I. Garrafa lehiaketa egingo dute txakolina erabiliz. 14:00etan jakinaraziko du epaimahaiak nor izango den irabazlea.
Musika
Kontzertuak ere ez dira faltako. Vital Kutxako Bandak emanaldia eskainiko du eta San Anton plazan zeltiar kontzertua egongo da “AmurrioWhistles&Co” taldearen esku eta jazzak ere bere tartea izango du “Amurrio Modern Band”-i esker. 12:00etan eta 13:00etan hurrenez hurren.
Bukatzeko 15:30ean Erromeria dantzatzeko parada egongo da.
Talde eta elkarte anitzen mezua
Gainera, goizean zehar hainbat taldek bere mezua zabalduko dute Amurrion. Hauteskunde europarretan parte hartzen dute alderdi askok mahaia jarriko dute eta Fracking Ez Aiaraldeak sinadura jasoko ditu haustura hidraulikoaren aurkako herri ekimen legegilea sustatzeko.