Hauspoa Kultur Gunearen ibilbidea bukatu egin da. Hala jakinarazi dute elkarteko kideek ohar baten bidez. Hauspoa Kultur Gunea Amurrioko lokal batean zegoen, baina lokal hori itxi egin behar izan dute elkarteko kideek eta, hala, 2012an hasitako proiektuari bukaera eman diote.
Indar eta diru falta da Hauspoa ixtearen arrazoi nagusia, elkarteko kideen esanetan. “Hainbat zailtasun izan ditugu eta zailtasun horiek gainditu ezinik genbiltzanez proiektuari bukaera ematea erabaki dugu”, azaldu dute.
Hala ere, Hauspoa proiektuaren baitako hainbat egitasmo mantenduko direla jakinarazi dute. Sasien Sehaska banaketa kolektiboa, adibidez, funtzionatzen jarraituko du, eta Amurrioko Lokalean zeuden artxibo eta liburutegia Laudioko Orbeko Etxean egongo dira hemendik aurrera.
Bi urteko ibilbidea
2011ko abenduan sortu zen Hauspoa elkartea, Aiaraldeko jendartearentzako topagune moduan. Garai hartan Amurrioko Dionisio Aldama kaleko 5. zenbakian zuen elkarteak lokala, eta liburutegia, objektuen trukerako txokoa eta beste zenbait egitasmo topatu ahal ziren bertan. Handik urte batera elkartea Aiala etorbideko lokal berri batera mugitu zen eta orduz geroztik bertan egon da.
Makina bat hitzaldi, proiekzio, eta eztabaida antolatu dituzte elkarteko kideek 2011tik hona. 2012Ko maiatzean osasunaren autogestioaren inguruko jardunaldiak antolatu zituzten, eta urte bereko ekainean Hauspokada jaialdia antolatu zuten Etxaurren ikastolan. Memoria historiakoari buruzko pare bat jardunaldi ere antolatu dituzte; baina dinamika iraunkorragoak ere jarri dituzte abian: gurasoen topaleku izateko helburuarekin sortutako heziketa taldea, esaterako. Aiaraldeko Greba Plataforman ere aktiboki hartu dute parte elkarteko kideek.
https://vimeo.com/92585209