"Hileko lehen ostegunak" izeneko taldeak antolatu du ekimena. Amurrioko hogeitamar literaturazale inguru biltzen dira talde horretan eta urtero topaketa ireki hori prestatzen dute Liburuaren Eguna hurbiltzen denean. Bosgarren edizioa izango da aurten.
Amurrioko Kultura Etxean izango da hitzordua, maiatzaren 8an, osteguna, arratsaldeko 19:30etatik aurrera. Bertan testu ederrak irakurri, errezitatu edo besterik gabe entzun ahal izango dira. Sarrera librea eta dohainik da.
Testu proposamenak literaturatopaketa@gmail.com helbidera
Egun horretan irakurriko diren testuen aukeraketa, amurriar literaturazale guztien artean egin nahi dute antolatzaileek. Horregatik literaturatopaketa@gmail.com helbidea sortu dute edonork bere testu proposamena bidali dezan. Gaia librea da, norberarengan zirrara berezia sortarazi duen testu zati bat edo poema esanguratsu bat izan daiteke. Testua aukeratzeko arrazoiak azaldu daitezke edo besterik gabe era anonimoan bidali. Testu propioa ere proposa daiteke. Irakurketa norberak egin dezake edo ekitaldian izango den errezitatzailearen esku utzi bestela.
Liburu trukea
"Hileko lehen ostegunak" taldeak liburu fondo bat osatu du azken urteotan eta hurbiltzen diren literaturazaleen esku jarriko du Maiatzaren 8an. Jadanik irakurrita dituzten liburuak ekarri eta trukea egiteko deia zabaldu nahi diete herritarrei.
Hileko lehen ostegunero liburu artean
Talde antolatzailea hileko lehen ostegunero biltzen da Kultura Etxean gustu literarioak partekatzeko asmotan. Hilero taldekide bat arduratzen da saioa prestatzeaz, betiere literatura ardatza izanik. Urtero "La Gatera" izeneko barne aldizkaria argitaratu ohi dute taldekide desberdinen ekarpenekin, ekaina aldean izaten da hori. Talde irekia da, literaturazale guztiei irekita dagoena.