Guk Baik, Amurrioko herritar partehartze plataformak, udalaren jarrera salatu berri du lonjen inguruko araudi berria kaleratzeko momentuan izan duen jarrera dela eta. Euren esanetan Josune Irabien alkateak gidaturiko udal gobernuak ez du araudi berri hau eragile sozialekin kontsentsuatu ez eta eragileon alegazioak kontuan hartu ere. Gogora dezagun duela zenbait hilabete Amurrioko Udalak eztabaida prozesu bat ireki zuela lonjen jabeen, bizilagunen eta herriko gazteen artean gazte-lokalen inguruko araudi bat adosteko.
Bestalde Guk Bai plataformak, prentsa ohar baten bitartez, gaineratu du ez duela zalantzan jartzen udalaren erabakia legezkoa denik, baina ez morala denik “Amurrioko udal gobernu taldeak hainbeste defendatzen duela esaten duen herritar parte hartzea albo batera uzten duelako”.
Araudi berriarekiko adierazi dituzten ezadostasunen artean ordenantzak adin mugapenen artean markatzen dituen ezberdintasunak daude.
Araudiaren onarpena
Gazteen lonjen inguruko araudia asteartean egindako ezohiko udalbatzan onartu zen. PSE-EE, PP eta EAJ alderdiek alde bozkatu zuten eta Bildu abstenitu zen.