Apirilaren 8an egindako ezohiko udalbatzan HAPNaren -hiri antolamendurako plan nagusia- aurrelaburpena onartu zen. PSE-EEk eta EAJk alde bozkatu zuten. Bildu, erabilitako prozeduran partaidetza gehiago behar zela argudiatuz eta lan batzuen finantzazioaren bideragarritasuna argi ez duela ikusten azaldu eta gero boza kritikoa eman zuen. Hau da, Bilduko 5 zinegotzi abstenitu ziren eta 2 zinegotzik alde bozkatu zuten onarpena errazteko. HAPN aurrelaburpenak aurrera egiteko gehiengo kualifikatua beharrezkoa baitzen. Pp aldiz abstenitu zen, plan berriak familia bakarreko etxeak eraikitzea oztopatzen duela uste du eta.
Gutxiago eraikiko da
Eusko Jaurlaritzaren irizpideak jarraituz, HAPN berriak eraikitzeko erabili daitezkeen lursailak mugatuko ditu, demografiaren joeran ez baita hazkunderik aurreikusi. Horrek esan nahi du lursail urbano gehiagorik ez direla klasifikatuko. Aldiz, kalifikazio hori duten hainbatek bilakaera izango dute eta landa-lurzoruak izango dira etorkizunean.
Hori dela eta Batzar Administratiboetan ere aldaketa egongo da. Erakin gehiago egin ordez, dauden etxebizitzen segregazioa onartuko dituzte, eraikin bakoitzean etxebizitza bat baino gehiago egon dadin.
Bestalde, mendebaldeko erronda bukatzeko urratsak emango dira. Dena den, planaren alde garrantzitsuenetakoa trenbidea lurperatzea izan daiteke. Dagoen moduan, trenaren ibilbideak herria bitan zatitzen du eta hori saihestu nahi dute, bi zatien arteko mugikortasuna ahalbidetuz. Lan inportanteak suposatuko lituzke lurperatzeak.