Leire Berrocal aktore amurrioarrak proiektu berri bat du esku-artean: “Fuego” filma. Bilbon grabatuko den film luzea da “Fuego”, eta Jose Coronado aktorearekin arituko da Berrocal bertan. Luis Mariasek idatzi eta zuzendutako thillerra izango da, eta Euskal Herriko gatazka politikoan egongo da girotua: ETAren atentatu baten ondorioz Carlosen (Coronado) emaztea hil eta alaba elbarriturik geratuko da. Mendeku gisa, atentatua egin zuen ETAko militantearen familiaren aurka oldartuko da Carlos, eta militantearen semea elbarriturik utzi eta emaztea (Berrocal) hiltzeko asmoa izango du.
Mariasek adierazi du “istorio gurutzatuez” osatutako istorioa izango dela “Fuego” filmak kontatuko duena, zeinetan “bortxakeria terrorista kausa ezberdinengatik sufritu duten pertsonaiak” azalduko diren. “Politikoki, sozialki, ideologikoki eta pertsonalki oso bando ezberdinetan kokatutako pertsonaiak dira.
Bakoitzak bere zauriak ditu eta etorkizunari aurre egin beharko diote”, azaldu du zuzendariak, eta gaineratu du Bake eta elkarbizitza idazkaritzaren oniritzia jaso duela proiektuak hasieratik. “Etorkizuneko elkarbizitzarako oso baliagarria suertatu daitekeela uste dute”.
Coronadok, bere aldetik, filma “arriskatu eta gogorra” izango dela ziurtatu du. “Hemendik hilabete batzuetara egindako lanaren emaitza ikusi ahal izatea espero dugu”, adierazi du. Martxoa eta apirila bitartean grabatuko dute filma.
Berrocalen hamargarrena
Leire Berrocalen hamargarren filma luzea izango da “Fuego”. 1994an azaldu zen aktorea pantaila handian lehen aldiz, “Talk of angels” filma estatu batuarrean. Orduz geroztik bost filma labur eta telebistarako bost telesail ere grabatu ditu. Antzerkian aritu izan da baita, “Diez” eta “Hoy no puedo ir a trabajar porque estoy enamorado” obrekin. Sariren bat ere jaso izan du: 1996an “El Mundo al cine vasco” garaikurra jaso zuen aktore onenaren postuan “Extasis” eta “Calor... y celos” filmetan egindako lanagatik.