Gimnasia erritmikoko VII. Aresketa txapelketa egin zen martxoaren 22an, igandea, Amurrioko Bañueta kiroldegian, Aresketa taldeak antolatuta. 140 gimnasta bertaratu ziren norgehiagokan parte hartzera. Gipuzkoa, Bizkaia, Nafarroa, Errioxa eta Arabatik bertaratu ziren.
Txapelketa bi zatitan banatu zen. Lehenbizi ikasle mailako gimnastak aritu ziren elkarren artean lehian, pilota, maza eta uztaiak baliatuaz zein inolako tresnarik gabe.
Aresketa taldeko hainbat kide podiora igo ziren txapelketaren zati honetan: Ixeia Ortiz eta Oneka Izarzelaia (2. eta 3. postuak tresnarik gabe Benjaminen kategorian), Maialen Izarzelaia (3. postua Kimuak B kategorian tresnarik gabe), Ainhoa Gondra (2. Kimuak A kategorian tresnarik gabe), Naroa Dominguez (3. Gaztetxoak B kategorian pilotarekin), Idoie Velez (1. Gaztetxoak A kategorian uztaiarekin), Irene Esparza (1. Gaztetxoak A kategorian pilotarekin) eta Leire Arberas (1. Gazteak A kategorian mazoekin).
Atsedenaldiaren ostean federatuen txanda iritsi zen, eta hemen ere Aresketako hainbat gimnastek podiora igotzeko aukera izan zuten: Nerea Monasterio (2. postua base kadeteetan zintarekin), Jugatxi Jimenez (2. postua Junior kategorian uztaiarekin). Taldekako norgehiagokan ere bigarren postua lortu zuten Aresketakoek, Junior kategorian.
Espainiako txapelketara
Antolatzaileak txapelketaren emaitzekin “oso pozik” daudela adierazi dute. “Oso ondo antolatu dugu eta gimnastek ere oso ondo egin dute haien ariketak”, azaldu du taldean entrenatzaile lanetan dabilen Elisabet R. Andak, “emaitza nahiko onak izan ditugu klub moduan”.
Amurrioko txapelketa ez da azken zita izango. Aresketa taldeko lau kide Guadajarara joango baitira apirilaren 25etik 27ra bertan egingo den Espainiako Txapelketan parte hartzeko: Nerea Monasterio, Paula Lopez, Maialen de La Peña eta Leire Aldama.