Aratusteen bukaera ospatzeko Judas Kakarro erretzen dute Amurrion. Baina pertsonaia ospetsua bada, bere historia ez da hain ezaguna. Luiso Lopez Aztarnako kideak Ziripot taldearen lanak eta lekukotasun ugari jaso ditu Kakarroren ibilbide historikoari buruz.
Zentzu horretan, Luisok dio Kakarroren arrastoak ez daudela bakarrik Amurrion. Baranbion, Orozkon eta Euskal Herriko eta kanpoko -Burgos, adibidez- hainbat lekutan topa daitekeela bere eragina Aratusteei lotuta.
Antzinako gizartean bitartekoak askoz urriagoak ziren eta mozorratzea ez zen ohitura hedatuta, bai ordea Kakarroren pertsonaia. Auzoetan eta herrietan pertsona batek zaku eta kapela zaharra jantziz, bere burua zikindu eta txantxak egiten zituen.
Umeak txerri-hesteekin egindako puxika batekin jotzen zituen eta baserri eta tabernetan sartzen zen jendeari txantxak egitera. “Garai horretan eta egun ospatzen ziren Aratusteak ez zuten antzekotasunik. Gaur egun kontsumoaren inguruan ospatzen da: mozorroa erosten da eta gazte eta umeei zuzenduta dago gehienbat. Antzinan helduen jaia zen.” Adierazi du Luiso Lopezek.
Debekua
Guda ostean Kakarro Birigarro debekatu zuten Amurrion. Aldiz, Baranbion ospatzen jarraitu zuten. Ezberdintasun horren arrazoia, antza, krimen batean datza. Luiso Lopezek adierazi du Kakarroz mozorrotutako pertsona batek labankadaz hil zuela herritar bat. Horren ondorioz, istiluak ez ezik, Guardia Zibilak erabaki zuen Kakarro debekatzea.
Frankismoa bukatu arte ez zen berriro Judas Kakarroren ohitura berreskuratu.