Iragan urtarrilaren 30ean erabakitakoarekin bat, etxeko landare-olioa biltzeko sistema aldatuko da. Orain arte janari-dendetan jarritako ontzietan utzi izan da olioa.
Sistema hori, dena den, ez da eraginkorra izan. Batetik, dendak eurak ez zeudelako pozik ontziok garbitu eta zaintzeko prozesuarekin. Eta, bestetik, urtero birziklatutako olio-kopurua, beste udalerriekin alderatuta, txikia izan delako. Hala, bada, eta Aiarako Kuadrillak egindako proposamenari jarraituz, 900 litroko 4 edukiontzi metaliko jarriko dira kalean, eta hemendik aurrera hor utzi beharko da olioa.
Edukiontziak toki hauetan egongo dira: Landako auzunean (Txantxangorri tabernaren parean); Zabalekon (San Jose elizaren ondoko aparkalekuan), Dionisio Aldama kalean (Cruz supermerkatuaren ondoan) eta Araba kalean (esne-makinaren ondoan).
Edukiontziak, hasiera batean, bi astean behin hustuko dira, eta hilero garbituko dira.
Olioa egokiro itxitako ontzietan (olio-botilak, esne-botilak…) eraman beharko da bilketa-puntuetara. Birziklatutako olioa, gero, biodiesel gisa erabiltzeko moldatuko dute.