Guk Bai Amurrioko herritar batzuek sortu duten taldea da. Hurrengo udal-hauteskundeetan aurkezteko aukera aztertzen ari dira, eta, bitartean, parte-hartzezko prozesuak bultzatzen ari dira, “tokiko gobernuen ardura bertan bizi diren auzokideena” dela sinetsita.
Horren harira, bada, hainbat erreklamazio eta kexa aurkeztu dizkiote Udalari gazteen lonjak arautzeko ordenantzari buruz.
Dena den, taldeko bozeramale Beatriz Izagirrek hedabideei bidali dien prentsa-oharrean adierazi du Udalak lonjei buruz hitz egiteko egin dituen bilerak ez direla inolaz ere eraginkorrak izan. Bilera horietan, inplikatutako eragile guztiek parte hartu dute: gazteek, lonjetako jabeek eta auzokideek —halaxe azaldu zuen Eder Sanchez zinegotziak aiaraldea.com-ek egin zion elkarrizketan—.
Guk Bai-k uste du, bada, bilerak ordenantza jendaurrean egoteko epea amaitu aurretik egitea komeni zela eta ez gerora. Izan ere, haien aburuz, bilerok izaera informatibo hutsa izan dute, eta helburu bakarra izan da aurretik idatzitako ordenantza aurkeztea. Are gehiago, jasotako alegazioak aztertu ez badira ere, eta Udalbatzaren Osoko Bilkurak oraindik ordenantza behin betikoz onartu ez badu ere, EAJko udal-gobernuak aurreratu du bi hilabete barru jarriko dela indarrean araudi berria. Egintzat ematen du.
Halaber, prentsa-oharrean zera zehaztu dute: ordenantza adostuagoa eta eraginkorragoa lortzeko, bilera bakarra egin beharko litzatekeela, horrek inplikatutako alde guztien parte-hartzea bultzatu eta kaltetu guztien ikuspuntuak partekatzeko balioko lukeelako.