Udalak auzobegiralearen figura sortu du herritarren eta administrazioaren arteko komunikazioa errazteko. Ekimena duela hilabete batzuk jarri zuten abian.
Helburua, auzo-bileretan herritarrek udal administrazioaren lanen eta zerbitzuen inguruan egiten dituzten proposamenak bideratzea da; auzobegiralea iritzi hauek jasotzen dituen erreferentziazko pertsona bihurtuz.
Ana Izquierdo Udaleko parte hartzeko arduradunak dioenez, auzobegiraleak “politikarien papera osatzen du, auzo-batzarren ordezkariekin komunikazio zuzena ezarriz”. Gainera, pertsona horrek auzo bati buruzko iritziak edo informazioa eman nahi duen edozein herritarrarentzako hurbila izan beharko du. Auzoetako batzarretako ordezkariekin lehenengo bilera izan ondoren udalak honelako pertsona bat behar zuela adostu zen”, esan du Izquierdok. 2013ko azarotik Parte Hartze Herritarra eta Udal Gardentasunerako zerbitzu bat abian da udaletxeko lehenengo solairuan. Horregatik, udaleko parte hartzeko teknikariaren lanari auzobegiralearena batu zaio. Hortaz, Izquierdo izango da Amurrioko auzobegiralea.
Auzobegiralearen zereginak
Auzobegiralea udalaren eta herritarren arteko komunikazioa errazteko sortu den figura da, baina beste gauza asko ere egiten ditu. Hala, bere zereginen artean honako hauek daude:
- auzoetan egiten diren bilerak prestatu eta dinamizatzea
- jardueren garapena ikusteko auzoetara ohiko bisitak egitea
- auzoen ordezkariekin bilerak egitea eta behar izanez gero, jardueren garapenen inguruko iritziak jasotzea
- sei hilero lanen egitearen inguruko txostena idaztea
- orokorrean, Udalaren eta auzoen arteko ordezkaria izatea