Herriko hirigintza antolatzeko plan orokorraren barruan Aldaiko gasolindegia lekuz aldatzeko hiru proposamen agertu dira. 2009tik ari da udala zerbitzuaren kokapena aztertzen. Aurreratu dutenez, errepide nagusien saretik gertu jarri nahi dute, etxebizitza eremuetatik aldentzeko.
Izan ere, Amurrio inguruetan gaur egun bi gasolindegi daude: herri erdikoa -Aldai kalean dagoena- eta Lezamakoa. Aukeren artean atera diren lekuak Saerin jatetxearen inguruko bi eremu eta Zabaleko biribilgunea dira. Hau da, Amurriotik Laudiora ateratzeko dagoen azken biribilgunea.
Gasolindegiaren geroa
Trantsizioa egiten den bitartean, baina, ez dituzte lanpostuak kolokan jarriko. Erabaki irmoa izan arte zabalik mantentzeko apustua egingo dute. Gero, gasolindegiko langileekin akordio batera iristen saiatuko dira, zerbitzuak sortzen dituen lanpostuak mantendu nahi dituztelako.
Gaur egun gasolindegia kokatuta dagoen tokian zer egin ere zehaztu dute: Dionisio Aldama eta Aldai kaleak lotuko dituen biribilgune bat.
Amurrioko hirigintza antolatzeko plan orokorra parte hartze prozesu baten bidez egiten ari da udala.