IBAI RUIZ (Amurrio, 1990) kick boxingean aritzen da. 2010ean eta 2012an Euskadiko Txapelketa irabazi zuen. Aurten, aldiz, Espainia mailakoa. Egun, Portugaleteko klubeko kidea da. Kirol noblea baina gogorra dela dio.
Nolatan hasi zinen jolasten kickboxingean?
10 urterekin hasi nintzen, Amurrion aitak apuntatu ninduen. 15 urterekin aldatu egin nuen, gogorrago entrenatzea erabaki nuen. Laudion lau urte eta erdi eman nituen entrenatzen talde batean. Orain Portugaleten nago. Lau urte daramatzat han.
Zerk bultzatu zintuen kirol honetara?
Niri futbola gustatzen zitzaidan, baina aitak mugendora, antzeko kirol batera, apuntatu ninduen. Pixkanaka, kickboxinga gustatzen hasi zitzaidan eta apuntatu egin nintzen.
Zergatik?
Kirol noblea da, ezberdina. Lehiakide guztiak aukera berdintasunean gaude (pisua, maila…). Oso kirol gogorra da.
Profesionalki lehiatzen ibili zara, ez?
Neoprofesional mailan nago orain. Aurten 6-7 borroka izan ditut. Gainera ez dut lesiorik izan, hori oso garrantzitsua da. Kickboxingean lesioak oso normalak dira. Gurean ez da lehiaketarik egoten, entrenatzaileari pisuaren araberako borrokalariak eskatzen dizkiote. Borroka hitzartuak dira. Beste alde batetik Euskadiko eta Espainiako txapelketak daude. Azken urteetan bietan hartu dut parte.
Saririk irabazi duzu?
2010ean eta 2012an Euskadiko Txapelketa irabazi nuen. 2013an, aurten, Espainiako amateur mailakoan lehengo geratu nintzen, Leongo Ponferrada herrian. Kirol honetan sariak irabazteak ez dizu bizitza aldatzen, motibazioa eman baizik. Jendeak gaubeletan arreta eta miresmen gehiagorekin begiratzen zaitu.
Eskualdean kirol honek badu zaletasunik?
Lekuaren arabera. Aiaraldean apenas dago zalerik. Galizian, Asturias, Herrialde Katalanetan ..zaletasun handia dute.
Etorkizuna nola ikusten duzu?
Hemendik kanpo. Kirolari profesional izateko, Madrilen, Bartzelonan edo Kanariar Uharteetan izan beharko du. Bertan baitago mailarik gehien.
Nolakoak dira entrenamenduak?
Fisikoak, teknikoak eta jotzea. Boxeolarien eskularruekin, manoplekin, kolpeak lantzen ditugu. Paoekin, aldiz, hankak potentziatzen ditugu, ostikoak emateko.
Eta konbateak?
Amateur mailan 3 asalto bi minutukoak, neoprofesionalean 4 asalto 2 minutukoak eta azkenik maila profesionalean 3 asalto 3 minutukoak. Motzak irabazten zoazenean, amaiezinak galtzen zaudela.
Indarra ala azkartasuna, zer da garrantzitsuagoa?
Biak, ondo konbinatu behar dira. Korrika egitea ere oso ona da, gimnasioan pesak eta abar egitea. Eta, kideekin jotzea.
Kirol agresiboa da?Ez, tontoren bat beti dago baina golpeak ondo eramaten ditugu, laguntasunez. Saihetsa, ahoa apurtzea normala da baina hor geratzen da dena. Niri besoa, belauna, ahoa, saihetsa… apurtu didate. Entrenamenduak babestuta egiten ditugu, konbateetan ez daramagu ezer.
Kirolari bezala zer erronka jarri diozu buruari?Urtea osorik bukatzea. Gauzak ondo badoaz jarraitzea gustatuko litzaidake gorputzak ahal duen arte.