Udaleko Kirol Sailak eta Psikologia eta Pedagogia Laguntzarako Udal Zerbitzuak kirolariei zuzendutako programa psikopedagogikoa ezarri dute. Helburu nagusia kirolak haur eta gazteengan sortzen dituen balio positiboak bultzatzea eta desegokiak arintzea da.
Jomuga hori lortzeko hiru oinarri izango ditu programak: kluben langileak, kirolarien familiak eta kirolaria bera. Hiru eragile hauen errealitatea ezagutzeko eta beraien beharretara erantzun ahal izateko galdetegia prestatuko dute. Gainera, kirol jarduerak egiten dituzten haurren familiei informazioa helaraziko zaie, hala nola jarraibide ezberdinekin edota galdu edo irabaztearen inguruko aholkuekin.
Bestalde, kirol klubekin tailerrak egingo dituzte eta gurasoen eta kirolarien arteko harremanak, komunikazioa eta etsipena edo konfiantza moduko alderdi emozionalak jorratuko dira. Xedea klubek eta kirol eskolek modu koordinatuan parte hartzea da, taldekako edo banakako kiroletan agertzen diren balioak eta zailtasunak agertzeko. Horrela, bakoitzak besteei bere estrategiak, konponbideak edo arazoak azalduko dizkie.