RUBEN LOPEZ (Amurrio, 1985) Diswar musika taldeko kidea da. Amorruz beteriko punk gordin eta trinkoa jorratzen du 2010. urtean sorturiko Diswar taldeak, D-beat punk izenez ezagutzen dena, alegia. Berriki Europan zehar ibili dira, eta Carlos (Bilbo) Jon (Sodupe) eta Iñigo (Eibar) taldekideekin batera biraren eta taldearen nondik norakoen inguruan mintzatu zaigu.
Berriki Europan zehar biran ibili zarete. Zenbat kontzertu eman dituzue eta zein hirietan?
Bira Donostiako Kamorräh grind taldearekin partekatu dugu, eta programatuak zeuden 13 kontzertuetatik 9 eman ditugu. Hiriotan jo dugu: Zarautz (EH), Bordeaux (Fr), Cachan-Paris (Fr), Gent (Belgika), Hamburgo (Alem.), Rostock (Alem.), Leipzig (Alem.), Berlin (Alem.), Giessen (Alem.), Brest (Fr).
Zer talderekin partekatu duzue eskenatokia?
Bederatzi kontzertu eman genituela kontutan hartuta, zerrenda luzea da: Kamorräh, I.O.N.U., Culmine, Die to death, Krush, Infesto, Herida Profunda, Exilent, Sunflowers of death, Disko Crunch, Operation Semtex, Human dead ends, Justicia Putrida… eta ziurrenik ahazten dugun besteren bat.
Zer nolako lokaletan jo duzue?
Nagusiki lokal autogestionatuetan jo dugu, hala nola, tabernetan, zentro sozialetan edota Wagenplatz-etan (lur eremuak non jendea karabanetan, kamioietan edo autobusetan bizi den)
Zelan sortu da Europan jotzeko aukera?
Aukera?.... egiazki ez da aukera bat, sinpleki apurka osatzen eta gauzatzen doan ideia bat baizik. Ez gara Europatik inork deitu gaitzan zain egon, gu izan gara joan garen lekuetara deitu eta idatzi dutenak.
Zelan antolatu duzue bira eta kontzertuak? Zuek autogestionatu duzue? Zaila al da horrelako zerbait antolatzea?
Oso sinplea da. Bira egiteko duzun denbora oinarri hartuz, mapa bat hartu eta jotzera nora joan nahi duzun erabakitzen duzu. Ondoren leku horietan egon daitezken kontaktuak bilatzen dituzu. Kontaktuetako batzuk Euskal Herritik igaro diren taldeei esker lortzen dituzu, beste batzuk lagunak ditugun musika taldeak bertan egonak direlako, edo bilatzen dituzulako... Segidan mezuak idazten dituzu, erantzuten dizute eta horrela apurka ibilbidea osatzen zoaz. Hilabeteetako lana da, mezu asko idatzi beharra dago eta buruhausteak ere badira, noski, baina argi dago zerbait lortzeko lan egin behar dela.
Autogestionatua? ateratzen duzunarekin eduki ditzakezun gastuak ordaintzen zoaz. Kontuan hartu afaria, lotarako lekua eta gosaria antolatzaileen esku dagoela, eta horrez gain dirurik ere ematen dizutela.
Horrelako zerbait antolatzea ez da oso zaila; zaila dena, biran doazen lagunen denbora librea koordinatzea da. Beste guztia gutxika osatzen doa, argi dago ehunka eta ehunka mezu idatzi behar dituzula 15 egunetan 14 kontzertu lortzeko, baina gogoekin baldin bazaude lantzen duzu.
Zelan pasa duzue? Zer nolako sentsazioekin bueltatu zarete?
Biran joateak sentsazio pilo eragiten ditu; hiri berriak, adiskide berriak, zaporeak, usainak, koloreak... Pentsa, 15 egun zure taldekideekin, emozioen gorabehera guztiak etengabe nahasten, ehuneko ehunean dena partekatzen: nekea, poztasunak, gihar-min eta gogordurak, gaixotasunak, irribarreak... pufff! Sentsazio pilo bat, onak denak. Sentsazio txar bakarra bira bukatu eta zure buruari “eta orain zer?” galdetzen diozunean dator... gelditzen deneko inertzia hori. Tristura eta nekea batzen dira, egun batzuk pasa ondoren nostalgia ere sentitzen duzu, baina birako une desberdinak gogoratzen dituzunean poz handia sentitzen da.
Pasadizorik edo abenturarik? Lagun eta harreman berriak egin dituzue?
Aurten abenturarik handiena izan dugu. Gorago, programatuak zeuden 13 kontzertuetatik 9 eman ditugula aipatu dugu, ezta? Bada, abentura kontzertua eman behar genuen lekutik hamar kilometrotara hasten da. Gasolina bota behar genuen eta abiadura murriztean furgoneta soinu arraroak egiten ditu, zerbait apurtua balego bezala... eta hara furgonetako abiadura-kaxak zartatu egiten duela! Zer nolako fardela!. Furgoneta konpondu behar izan genuen, eta ondorioz lau kontzertu bertan behera utzi, bi Polonian eta beste bi Txekiar Errepublikan. Eskerrak punk mugimenduan bihotz oneko jendea ere badagoela eta ederki zaindu gintuztela, bederatzi lagun aterpetuz eta euren etxeko berotasuna eta lasaitasuna eskainiz. Rostock hiria eta bertako giroa ezagutzeko parada izan genuen, elkar lagundu eta adoretu ginen eta umore onak ez zuen behera egin. Datorren urtean kontzertuak bertan behera geratu ziren hirietara itzuliko garela zin egin genuen.
Bira batean beti egiten dira lagun eta harreman berriak, nabarmentzekoak denak.
Zer talde entzun dira biran zehar zuen furgonetako kasetean? Zeintzuk dira zuen eraginak?
Gure furgonetan denetarik entzun daiteke, kontutan izan bederatzi lagun joan garela. Bathory, Venom, Discharge, MCD, Cementerio Show, Derrota, Ekkaia... eta baita Italodisco, Rafaela Carra, Los Chichos, Los Calis, Bordon 4, Nasum... pufff, kilometro asko, ordu asko furgoneta barruan, gustu ezberdinak... oso aberasgarria.
Gure eraginak argiak dira: Dscharge, Anti-Cimex...
Ingelesez abesten duzue, zer diote zuen letrek? Egin al daiteke D-beat punk musika euskaraz? Ba al dago estilo horretako talderik euskaraz abesten duena?
Gure letrek gerraren lazturaz hitz egiten dute, gutxi batzuen interesagatik milioika biktima eragiten duen munstroaz; indarkeriaren bidez defendatzen den sasi-bakeaz eta hildakoen isiltasunaz. Orain letra berriak sortzen gabiltza, non krisi ekonomikoa bezalako gerra ikusezinei buruz hitz egiten dugun, erantzule berdinak dituen eta milaka hildako eragiten duen lubakirik gabeko gerra, eta abar.
D-beat punka edozein hizkuntzatan egin daiteke, ikusi besterik ez dago munduan zehar dauden talde mota ezberdinak, Brasiletik hasi eta eskandinaviar herrialdeetara edo Europatik hasi eta Hegoafrikara. Herrialde guztietan daude D-beat punk taldeak, eta gehien atsegin duten hizkuntzan abesten dute.
Antza denez azken aldian D-beat punk eta crust talde ugari sortu da mundu mailan, eta eszena hori indartsu ei dago egun. Zeintzuk dira eszena edo mugimendu horren ezaugarriak? Euskal Herrian existitzen al da eszena hori?
D-beat eta crust musika beti egon da hor, eta baliteke egia izatea egun gehiago ematen dela ezagutzera, ziurrenik jada hain berriak ez diren internet bezalako tresnei esker, eta baita abestiak errazki grabatzeko aukeragatik, egun ez baita derrigorrezkoa grabazio estudio batetik igarotzea.
konplexua da eszena baten ezaugarriei buruz mintzatzea noiz eta eszena horrek eszena bezala existitzeari uko egiten dion. Hau horrela da punkaren ondare dadaistagatik eta baita kulturaniztasun ideologikoagatik. Giro (mugimendu deitzea hanpatuegia litzateke) honetan mugitzen den jendea batzen duena Zu Zeuk Egin filosofiaren aldeko apustu erabatekoa da. Inork ez du zure ordez egin behar, zu zara zure “produktuaren”, zure zaletasunen, zure bizimoduaren erantzulea. Klase guztietako bitartekariak desagertzean askeagoa zara eta gizabanako bezala berresten zara. Beste ezaugarri komun bat zapalkuntza sistemak sortzen dituen edozein boterekiko higuina da.
Eszena hori Euskal Herrian existitzen ote den? Berriki Argia aldizkarian “eszena” hori existitzen dela dion erreportaje bat azaldu da. Hemen uzten dizuegu esteka eta norberak erabaki dezala (http://www.argia.com/argia-astekaria/2382/hardcore-crust). Gipuzkoako zonaldeaz hitz egiten dute, beharbada han egiten baita lan gehien eszena hori mantentzeko; Bizkaian ere badaude zona batzuk non lan handia egiten den... Baliteke Araban eta Nafarroan mugimendu gutxiago egotea, baina ezjakintasunetik hitz egiten dugu. (Dei egiten diogu zonalde hauetako jendeari euren zonako errealitatea ezagutzera gonbida gaitzaten, poz-pozik hurbilduko gara).
Zelan ikusten duzue musikaren gaur egungo egoera eskualdean zein Euskal Herrian?
Musikaren egoera ez dugu ez hobeto ez txarrago ikusten, betiko legez dago... Jaio eta garatzen ez diren taldeak, hilabete edo urte batzuen buruan desegiten direnak; hazi eta garatzen diren taldeak eta apurka aurrera egiten dutenak, ahal den guztietan eta ahal den lekuetan jotzen dutenak. Jotzeko lekuena da gure ustez arazorik larriena, geroz eta toki gutxiago baitago kanporatzeen edo ikuskizunen inguruko legedien ondorioz. Sistemak bilatzen duen gauza bakarra kultura mainstream (eta ez soilik musikari dagokionez) bat mantentzea da, edukinez hutsa, zeinetan ikuslea kultur kontsumitzaile soila den eta ez duen tarterik egiazki gustuko duena erabaki eta hautatzeko, erabiltzaile hutsa bilakatuz.
Taldeei dagokionez egoera orokorra oso ona da, talde mordoa dago. Entsegu lokalena beste kontu bat da...
Zer material kaleratu duzue orain arte? Zuek ekoiztua izan da? Non lortu daiteke? Sarean non aurki zaitzakegu?
LP bat grabatu dugu, Sounds Of War izenekoa, eta zigilu ezberdinen arteko edizio bat izan da (In My Heart Empire, Chaos 666, La Humanidad Es La Plaga eta Rawmantic Disasters). Geroz eta zailagoa da aurkitzea, baina nahi izanez gero zigiluotakoren bati idatzi eta eurek esango dizuete. Gure bandcamp-ean dohainik jaitsi dezakezue. Hauek dira gure bandcamp-aren eta facebook kontuaren estekak:
http://diswardbeat.bandcamp.com/
https://www.facebook.com/diswarband
Zer proiektu dituzue? Beste irtenaldiren bat bistara?
Azaroa erdialdean disko berri bat grabatzeko asmoa dugu, kanta berriak egin eta ondoren han eta hemen ibili gure kantuekin... Irtenaldirik momentuz ez, esan bezala, grabatu eta kanta berriak sortu. Hurrengo kontzertua Eibarren Azaroak 23an emango dugu, Atarazarata Fest-ean , beste sei talderekin batera (Raiser, Kamorräh, Fragä, Colapso, Fly Shit eta Managaitz).